विश्वकै सर्वाधिक ठूलो फुटबल कुम्भ विश्वकप–२०१८ सम्पन्न भएको छ । यस प्रकारको ठूलो उत्सवलाई सफलतापूर्वक सम्पन्न गरेर रूसले विश्वमा आफ्नो देशका बारेमा एक पटक फेरि सकारात्मक सन्देश प्रवाह गरेको छ । 

सन् २०१८ का लागि फिफा विश्वकप आयोजना गर्ने जिम्मेवारी पाएको समयमा रूसका बारेमा विभिन्न नकारात्मक धारणाहरू थिए । त्यतिबेला रूसका सम्बन्धमा सकारात्मक भन्दा आलोचनाका स्वर धेरै सुनिन्थे । रूसमा आलोचक, पत्रकार वा राजनीतिक प्रतिद्वन्दीहरूलाई जेलमा राखिन्छ वा बेपत्ता पारिन्छ भन्ने आम धारणा समेत थियो । विशेष गरी युरोपेली तथा अमेरिकी नागरिकमा रूसी नागरिकहरूले खुलेर बाँच्न पाएका छैनन् भन्ने धारणा थियो, तर उक्त धारणा अब परिवर्तन हुने भएको छ । विश्वकप हेर्न रूस पुगेका विदेशीहरूलाई रसियनहरूले भव्य स्वागत गर्नुका साथै उनीहरूलाई आफ्नो घरमा समेत राखेर स्वागत गरे । अतिथि सत्कारका लागि उनीहरूले कुनै कसर बाँकी राखेनन् । 

फिफा अध्यक्ष गियानी इन्फेनटिनोले त विश्वकपले कुनै पनि व्यक्तिलाई रूसको दिवाना बनाएको बताए । उनले एउटा अवसरमा विश्वकपका कारण रूसका वारेमा धेरै मानिसको विचार परिवर्तन भएको दाबीसमेत गरे । फुटबलले एक अर्कामा स्नेह, माया, पारिवारिक भावना एवं एकताको सन्देश प्रवाहित गर्ने भएकाले पनि यस्तो भएको उनको तर्क थियो । 

यद्यपि कडा सुरक्षा व्यवस्था भएको स्टेडियममा फाइनल खेलको दिन चार जना दर्शक मैदानमा प्रवेश गरे । यसले निकै चर्चासमेत पाएको छ । उनीहरू छिरेको केही समयसम्म त टिभीमा लाइभ समेत देखाइएको थियो । मैदानमा पस्ने मध्ये एक जना महिलाले त फ्रान्सेली खेलाडी एमबाप्पेसित हाइ फाइभ पनि गरिन् । उक्त घटनाको जिम्मा भने पुसी रायट्स नामको एउटा संस्थाले लिएको छ । फेसबुकमा घटनाको जिम्मा लिँदै उक्त संस्थाले सबै राजनीतिक बन्दीहरूलाई मुक्त गरिनुपर्ने लगायत अन्य विभिन्न माग राखेको छ । 

विश्वकप समापनको अवसरमा लुजनिकी स्टेडियममा फुटबल प्रेमी मात्र नभएर अन्य प्रसिद्ध कलाकारहरूको जमघटले पनि चर्चा पायो । समापन समारोहमा विल स्मिथ, निक्की जैम तथा कोसोभियनले आफ्नो गीत तथा विश्वकप एन्थेम ‘लिभ इट अप’ बाट फाइनल समारोहलाई जगाएका थिए । समारोहमा फ्रान्सका राष्ट्रपति इम्मानुएल म्याक्रो पूर्वराष्ट्रपति निकोलस सार्कोजीका साथ रंगशाला पुगेका थिए । क्रोएसियाकी राष्ट्रपति कोलिन्डा ग्राभर कितारोभिच आफ्नो पनि टिमको हौसला बढाउन रूस पुगेकी थिइन् ।

 जमैकाका सुपरस्टार स्प्रिन्टर उसेन बोल्टसमेत विश्वकपको फाइनल हेर्न रूसमा थिए । सन् २०१४ मा जर्मनीका लागि विश्वकप ग्रहण गर्ने कप्तान फिलिप लाहम तथा रूसकी सुपर मोडल भेदियानोभा ट्रफीका साथ स्टेडियम पुगेका थिए । त्यही समयमा रूसी राष्ट्रपति भ्लादिमिर पुटिन फिफा अध्यक्ष गियानी इन्फेन्टिनोका साथ स्टेडियममा थिए । 

विश्वकपको फाइनल फ्रान्सले जित्यो । विश्वकप पनि उसैले पायो, तर मिडियाले भने क्रोएसियाकी राष्ट्रपति कोलिन्डा ग्राभर कितारोभिचलाई चर्चामा ल्याए । उनले विजेता फ्रान्सका प्रत्येक खेलाडीलाई अंकमाल गरी बधाई दिनुका साथै क्रोएसियाली खेलाडीका सामु आँसु झार्दै सबैलाई सान्त्वना दिइन् । क्रोएसिया पहिलो पटक फाइनलमा पुग्नु नै ठूलो कुरा थियो । छोटो समयमै उक्त स्थानमा पुग्नु क्रोएसियाका लागि निकै उपलब्धि थियो । फाइनल खेल फ्रान्सले जिते पनि खेल कौशल भने क्रोएसियाको राम्रो भएको प्रतिक्रिया धेरैको रह्यो । क्रोएसियाली खेलाडीहरूले क्रोएसिया फर्किएपछि भव्य स्वागतसमेत पाए ।

विश्वकप विजेता फ्रान्सका खेलाडी स्वदेश पुगेपछि उनीहरूको पनि भव्य स्वागत गरियो । उनीहरूलाई फायर ब्रिगेडले ‘वाटर स्यालुट’ गर्‍यो भने एयर फ्रान्सको जेटले समेत पानी छर्केर टिमको स्वागत गरेको थियो । पेरिस विमानस्थलमा सबैभन्दा पहिले कप्तान ह्युगो लोरिस तथा कोच डिडियर डेसच्याम्प विमानबाट निस्कँदै विश्वकप ट्रफी प्रदर्शन गरेका थिए । 

त्यसपछि खेलाडीहरूले खुला छतयुक्त बसमा सवार भएर पेरिस सहरको परिक्रमा गरे । विश्वकप जितेको खुसीयालीमा लाखौं फ्रान्सेली सडकमा निस्किएर खुसीयाली मनाए ।