सलहेश दरबार, सिराहा

साप्ताहिक संवाददाता

माघ ३, २०७०

घना आवादी भएका जिल्लाहरूमध्ये नेपालको पूर्वी तराईमा अवस्थित सिराहा जिल्लाले ऐतिहासिक गाथा बोकेको छ। सिराहामा साढे ६ लाख मानिसको बसोबास छ। महेन्द्र राजमार्गमा पर्ने महेशपुर वा मिर्चैयाबाट १८ किलोमिटर दक्षिण गएपछि सिराहाको सदरमुकाम सिराहा बजार पुग्न सकिन्छ। जिल्लाका दुई नगरपालिका सिराहा र लाहानमध्ये लाहान पूर्व-पश्चिम राजमार्गमै छ। सिराहामा पर्यटकीय महत्व बोकेका विभिन्न दर्शनीय स्थलहरू छन्। विक्रमको सातौं शताब्दीसम्म राजा सलहेशको भव्य दरबार सिराहा बजारमा अवस्थित छ, जुन पछि गएर मुस्लिम आक्रमणमा परी ध्वस्त भएको अनुमान गरिन्छ। त्यसका साथै पकडिया गढ (किल्ला) को भग्नावशेष पनि हेर्न लायक छ। सिरहाका देवीदेवता तथा अन्य मठ-मन्दिरमा शाश्वनाथ महादेव, बालासुन्दरी भगवती आदि छन् भने प्राकृतिक सम्पदाहरूमा पाताली पोखरी, महेशपुर, कमल दह र उत्तरतर्फ बग्ने उत्तरायण बन्दीपुर प्रमुख छन्।

सिरहाको फूलबरियामा फुल्ने सुनाखरी फूल (सलहेस) यो क्षेत्रकै लागि प्रमुख आकर्षणको केन्द्र हो। हरेक वर्षको चैत मसान्त र वैशाख संक्रान्तिका बेला दुई दिन मात्र फुलेर मालाको आकार ग्रहण गर्ने सलहेसको सुगन्धका लागि निकै मानिस भेला हुन्छन्। यो फूल नयाँ वर्षका अवसरमा मात्र फुल्ने भएकाले नयाँ वर्ष मनाउन यो एउटा उत्तम गन्तव्य हुनसक्छ। काठमाडौंबाट सिराहा बीपी राजमार्ग (बनेपा-बर्दिबास) भएर जाने हो भने लगभग २ सय ७५ किलोमिटरको दूरीमा अवस्थित छ भने काठमाडौं-नारायणगढ-हेटौंडा भएर जाँदा ५ सय किलोमिटर तय गर्नुपर्छ। काठमाडौंबाट सिराहासम्मको बसभाडा अधिकतम ८ सय रुपैयाँ पर्छ। यात्राका क्रममा लाहान, सिराहा बजारलगायत राजमार्गका अन्य स्थानहरूमा सुविधायुक्त होटल तथा लज उपलब्ध हुन्छन्।

- एलपी शर्मा