 ज्योति मगर, गायिका/मोडल

आजकल केमा व्यस्त हुनुहुन्छ ?

गीत संगीतमै व्यस्त छु । विभिन्न कार्यक्रममा सहभागी भैरहेकी छु । अब नयाँ एल्बमको तयारी गर्दैछु ।

देशविदेशमा ज्योतिको माग बढिरहेको छ, पैसा त निकै कमाउनुहुन्छ होला नि ?

म आफ्नो कमाइबाट सन्तुष्ट छु । कमाइ भए पनि खर्च पनि राम्रै भएका कारण जोगाउन सकिएको छैन । 

हालसम्म कतिवटा गीत गाउनुभयो ?

करिब पाँच दर्जनजति गीत गाएकी छु । तीमध्ये सातवटामा गीतको भिडियोमा चाहिँ आफैंले अभिनयसमेत गरेको छु ।

किन बढी मात्रामा ‘सेक्सुअल’ प्रकारको अभिनय गर्नुहुन्छ ?

 आ–आफ्नोपन हो, म्युजिक, पोलिटिक्स, गेम र सेक्स सँगसँगै आउँछन् । यी चार चिजले कुनै न कुनै रूपले मानिसहरूलाई तान्छ । म गीतअनुरूप भिडियोमा अभिनय गर्छु । अचेल त यो मेरो प्याट्रोन नै भैसक्यो ।

स्टेजमा उत्तेजक शैलीमा प्रस्तुत हुनुहुन्छ नि ?

म दर्शकको चाहनाअनुसार स्टेजमा प्रस्तुत भएकी हुँ । त्यसलाई उत्तेजक शैलीका रूपमा लिनु हुँदैन । म दर्शकले नपचाउने खालको उत्तेजक रूपमा प्रस्तुत भएकी छु जस्तो पनि लाग्दैन । 

ज्योतिले लोकगीतमा विकृति सिर्जना गरी पनि भन्छन् नि ?

हो र ? तरकारीलाई मीठो बनाउन नुन र मसला जसरी मिसाइन्छ, मैले पनि लोकगीतलाई दर्शकको रोजाइमा पार्ने काम मात्र गरेकी हुँ । यसलाई विकृति भन्छन् जस्तो मलाई लाग्दैन । 

प्रेम प्रस्ताव कतिको आउँछ ?

केटी मान्छेलाई प्रपोज त आइहाल्छ नि । तर, जति मानिसहरूले सोचेका छन्, त्यतिचाहिँ आएको छैन । म अलि हक्की स्वभावकी भएका कारण पनि जोकोहीले प्रेम प्रस्ताव राख्ने हिम्मत गर्दैनन् । 

जीवन साथी त छान्नुभयो होला नि ?

कहिलेसम्म जीवन साथी नै भनेर त छानेको छैन, तर छान्ने क्रममा छु ।