‘म:म भन्नुस्, मोमो भन्नुस् वा म:मचा, सहरका बाल–वृद्ध, युवा–युवती र महिला–पुरुष– सबैको पहिलो प्राथमिकतामा पर्ने त म:म नै हो । ’

कान्तिपुर सहर फैलिएको छ । देशको संघीय राजधानीका जनता आरामपसन्द भएका छन् । सहरमा सुविधाहरू बढेका छन् । खल्तीमा पैसा छ भने पिज्जाहट पनि टाढा छैन, केएफसी पनि टाढा छैन । फुडमाण्डु, फुड मारियो, भोजडिल, भोक लाग्यो । कम, मिल नेपालजस्ता सेवाप्रदायक संस्थाहरूले रातबिरात जुनसुकै समयमा पनि र जुनसुकै रेष्टुराँबाट पनि खाना ल्याइदिन्छन् । खल्तीमा पैसा हुनेले भोको बस्नु पर्दैन । मीनपचासको जाडोमा अजबको आइसक्रिम खान मन लाग्यो । इच्छा गर्नुहोस्– १२ बजे पनि तयार छ । जेठको प्रचण्ड गर्मीमा तपाईंलाई इटलीको कफी पिउन मन लाग्यो– त्यो पनि तयार छ जुनसुकै समयमा । 

हिजोसम्म काँठ भनेर हेपिएका कान्तिपुर सहरका बत्तीसपुतली, नयाँ– पुरानो बानेश्वर, चाबहिल, बौद्ध, तीनकुने, महाराजगन्ज, ठिमी, भक्तपुर, ललितपुर र कीर्तिपुर– रमाइला उत्सवहरूका लागि सुबिधायुक्त रेस्टुराँको कमी छैन । बत्तीसपुतलीमा बाजेको सेकुवाले नयाँवर्षको उत्सव मनायो भव्य ढंगले । सिद्धार्थ फुडल्यान्ड– २०२० को स्वागतमा निकै जगमगायो । गौशाला चोकमा खुलेको शानदार होटल इम्पेरियलको आफ्नै तजबीज थियो नयाँवर्ष मनाउने । द्वारिका होटलमा नयाँवर्ष भव्य हुने नै भयो ।

देशमा अहिले ल्होत्सारको पनि उत्तिकै बिगबिगी छ । मंगलबारदेखि सुरु भएको छ तमु ल्होत्सार । नेपालका विभिन्न क्षेत्रमा बस्ने विभिन्न धर्म र सम्प्रदायका जनजातिहरू, जो यहाँ बसोबास गरिरहेका छन, अहिले यता, यही कान्तिपुर सहरतिर, मनाउँछन् नयाँवर्ष । यी उत्सवको आयोजना टुँडिखेलमा हुन्छ । यी उत्सवहरूका लागि भव्य फराकिलो पाटन चाहिन्छ । ठूलो मेला नै लाग्छ संघीय राजधानीमा । विभिन्न जनजातिका आकर्षक पहिरन र आभूषण देखेर कान्तिपुरका निवासी चकित पर्छन् । खानाको विविधता उत्तिकै रहर लाग्दो हुन्छ । मानिसको मुखमा पानी भरिने खालका खानाले सबैलाई लोभ्याउँछ नै । 

उत्सवहरूको बहार सुरु भएको छ कान्तिपुरमा । दरबार मार्ग र ठमेलको कुरा छाडौं । यी दुवै ठाउँ आधुनिक उत्सवहरूका लागि गतिला मानिन्छन् । दरबार मार्गमा रेस्टुराँको कमी छैन । चलेका र नचलेका दुवैथरि रेस्टुराँको भीड छ । दायाँबायाँ दुवैतिर पाँचतारे होटल छन् । बिरयानी र कबावजस्ता पारम्परिक लोकप्रिय खानाको चल्ती घटेको चाहिँ होइन, अहिले कान्तिपुर सहरमा चिनियाँ, कोरियन, भियतनामी, क्याम्बोडियन, मेक्सिकन खानाहरू लोकप्रिय भएका छन् । कान्तिपुर सहरमा अंग्रेजी बोलीमा बार्बेक्यू भनिने र नेपालीमा सेकुवा भनिने परिकारको लोकप्रियता हलक्क बढेको छ । जाडोको मौसममा म:म त म:म भई हाल्यो । म:म भन्नुस्, मोमो भन्नुस् वा म:मचा, सहरका बाल–वृद्ध, युवा–युवती र महिला–पुरुष– सबैको पहिलो प्राथमिकतामा पर्ने त म:म नै हो । मानिसहरू घाँटी रसाउनु अघि म:म खाएर आफ्नो ‘स्टामिना’ बढाउँछन् । त्यसपछि मात्रै ‘अझ अगाडि’ बढ्ने कुरा आउँछ । अगाडि काल्र्सबर्गमा बढ्ने कि टुबोर्गमा, नेपाल आइस रोज्ने कि गोर्खा स्ट्रङ्ग, यो तपाईंकै च्वाइस हो ।