नवदेवी सम्मानअन्तर्गत यसपटक मोफसलमा रहेर आ-आफ्नो क्षेत्रमा योगदान पुर्‍याइरहेका तर ओझेलमा परेका नारीहरूलाई सम्मान गरिएको थियो। नवदेवी सम्मान कार्यक्रम नवश्री सिंह तथा निरन्तर याक्थुम्बाको भजनद्वारा प्रारम्भ गरिएको थियो। दुई भागमा विभाजित कार्यक्रमको पहिलो भागमा वनसंरक्षणमा लागि परेकी कैलालीकी नन्दादेवी कुवँरले अन्नपूर्ण सम्मान हात पारिन भने सामुदायिक रेडियोमार्फत महिला शिक्षा र सशक्तीकरणका मुद्दालाई जोड दिएबापत रेडियो उदयपुरलाई भगवती सम्मान प्रदान गरियो। त्यस्तै कडा परिश्रम र साहसिक क्षेत्रमा समर्पित रसुवाकी र्‍याफ्टिङ तथा टे्रकिङ गाइड ऋतु ग्याम्दानले भवानी सम्मान प्राप्त गरिन् । चितवनकी मीना खरेल करुणा सम्मानबाट सम्मानित भइन्। ५५ वर्षदेखि रेडियो नाटकका माध्यमद्वारा चेतना फैलाउँदै आएकी लक्ष्मी भुसाललाई महामाया सम्मान प्रदान गरियो। कार्यक्रमको दोस्रो भागमा काभ्रेकी कल्पना कार्कीलाई लक्ष्मी सम्मान प्रदान गरियो भने २१ वर्षदेखि पूर्वाञ्चल ज्ञानचक्क्षु विद्यालयमा सेवा गर्दै हाल सोही विद्यालयमा प्रधानाध्यापक रहेकी धरानकी केशरी थापा सरस्वती सम्मानद्वारा सम्मानित भइन्। कञ्चनपुरकी पार्वती डगौराले भूमिहिनका लागि भूमि अधिकारको मुद्दा लडेबापत शक्ति सम्मान हात पारिन्। एचआईभी र एड्सका मुद्दामा संघर्षरत हेटौंडाको मकवानपुर महिला समूहलाई दुर्गा सम्मानले सम्मानित गरियो।