१४ जना प्रतिस्पर्धीलाई उछिन्दै हेटौंडाकी १६ वर्षीया सन्ध्या ढुंगानाले शनिबार साँझ मिस टिन नारायणी-२०१४ को उपाधिमा कब्जा जमाएकी छिन्। उनलाई पूर्व मिस नेपाल सदीक्षा श्रेष्ठले ताज पहिर्याइदिएकी थिइन्। 'बेस्ट हेयर स्टाइल' को उपाधि समेत जितेकी सन्ध्याले मिस टिन उपाधिसँगै ५० हजार नगद पुरस्कार, एउटा म्युजिक भिडियोमा खेल्ने तथा वीरगन्ज टेलिभिजनमा भिडियो जक्की बन्ने अवसरसमेत प्राप्त गरेकी छिन्। मिस टिन नारायणीको उपाधि जितेपछि हर्षको आँसु चुहाएकी सन्ध्याले जितले खुसीसँगै आत्मविश्वास पनि बढेको प्रतिक्रिया दिइन्। उक्त प्रतियोगितामा वीरगन्जकी श्रुति कुशवाहा फस्ट रनर्सअप तथा हेटौंडाकी दृष्टि बराल सेकेन्ड रनर्सअप घोषित भए। प्रतियोगिताको उपाधितर्फ बेस्ट डे्रस अनिता साह, बेस्ट क्याटवाक जेनिशा खडका, बेस्ट फोटोजेनिक पुनम महतो, बेस्ट स्माइल दिपा दोङ्ग, बेस्ट ट्यालेन्ट रोजु तामाङ, मस्ट ब्युटिफुल सृष्टि बराल, मिस इनर्जेटिक सोनी लामा भएका थिए।
असार २०, २०७१
वीरगन्ज
