आजभोलि मेरो व्यस्तता रेकर्डिङमा छ । दैनिक २/३ वटा गीत रेकर्ड भैरहेका छन् । बाँकी रहेको समय कन्सर्टलाई छुट्टयाउँछु ।

नयाँ के गर्दै हुनुहुन्छ ?

आफ्नै प्रोजेक्टको 'ओए झुमा.....' गीतको रेकर्डिङ सकिएको छ । 'धेरैलाई बाँढ्दा....' गीतको म्युजिक भिडियो भर्खरै श्रोतामाझ आएको छ । सात दिन नहुँदै यो गीत निक्कै चर्चामा छ । हरेक महिना कम्तीमा ८० वटाजति गीत-गजल रिलिज हुँदैछन् ।

तपाईंलाई हाइ डिमान्डेड गायक भनिन्छ नि ?

म पूर्ण व्यावसायिक गायक हुँ । सबै प्रकारका गीत गाइरहेको छु । सफल पनि भैैरहेका छन् । चलचित्र, गजल, कलेक्सन, आधुनिक सबै गीत श्रोताले मन पराइदिनुभएको छ । म गायन क्षेत्रमा स्थापित भैसकेकाले होला, सबैले माया गरेर हाइ डिमान्डेड भन्नुभएको, यो मेरा लागि खुसीको कुरा हो ।

सांगीतिक क्षेत्रमा लाग्नुभएको कति भयो ?

१६ वर्ष भयो । २०५६ सालमा पहिलो गीत 'निर्दोषी मायालु....' बाट यो क्षेत्रमा प्रवेश गरेको हुँ । मेरो पहिलो एकल एल्बम 'प्राप्ति' ले नै चर्चा पाएको थियो ।

एल्बम र गीत कति भए ?

अहिलेसम्म छवटा एकल एल्बम आएका छन्, प्राप्ति, सेन्टिमेन्टस्, प्रणय, प्रवेग, निर्झरी र हंगामा । कलेक्सनको गन्ती नै गरेको छैन । हालसम्म दुई हजार गीत बजारमा आइसकेका छन् ।

लोकप्रिय गीतचाहिँ कति छन् ?

कम्तीमा दुई दर्जनभन्दा बढी गीत लोकप्रिय र सफल छन् । मबिना कसैकसैलाई, उसले जति माया, डुबायो पापी मायाले, हंगामा भो, हे माया, पलपलमा जस्ता गीत सुपरहिट पनि छन् ।

तपाईंलाई स्टेज किंग भनिन्छ नि ?

कन्सर्टमा अत्यधिक बोलाइने गायक भएर होला, त्यसो भनिएको । दर्शक उफार्न सक्नु मेरो खुबी पनि हो । म महोत्सव तथा स्टेजमा नेपालमै सबैभन्दा बढी बोलाइने गायक हुँ जस्तो लाग्छ । हिउँदमा महिनाको २० दिन बाहिरै हुन्छु । वर्षमा ७/८ वटा मुलुक पनि पुगिरहेको छु ।

तपाईंका गीत कस्ता मान्छेले सुन्छन् ?

सबै प्रकारका स्रोता-दर्शक हुनुहुन्छ । यद्यपि युवाहरू धेरै हुनुहुन्छ । कन्सर्टमा सबै उमेर समूहका दर्शकको उपस्थिति उत्तिकै पाएको छु ।