उर्लाबारी—लोकल कुखुराले कोरलेको अण्डाबाट चारखुट्टे चल्ला निस्किएको छ ।
राजघाट—७ मा टंकमाया श्रेष्ठको घरमा कुकुराले चारवटा खुट्टा भएको चल्ला कोरलेपछि गाउँले सबै अचम्ममा परेका छन् । विरलै मात्रामा जन्मिने यस्तो चल्लाबारे जानकारी लिन छिमेकी गोवा लामाले राजघाटको प्रमुख बजारमा दुर्गापुरीमा ल्याएपछि त झन हेर्नेको घुईचो नै लागेको थियो । १० वटा चल्ला कोरलेको पोथीको एउटा चल्लामा चारवटा खुट्टा रहेको लामाले जानकारी दिनुभयो । उनले भने,यस्तो कुखुराको चल्ला कहिल्यै देखेको थिईन् । अचम्म लागेको छ ।’
चारवटा खुट्टा भएर हिडडुलमा केहि समस्या देखिएपनि अवस्था भने अन्य चल्लाको जस्तै सामान्य रहेको छ । चारवटा खुट्टा भएपनि दुईवटा खुट्टाले मात्र चल्ला हिड्ने गरेको छ ।
यस्तो चल्लाको जन्म हुँदा अशुभ हुने, कुखुरा मासिने जस्ता कुरा गाउँमा उठेपनि कुखुरा बाँचुन्जेल पाल्ने घरधनी टंकमायाले बताईन् ।
पशुविज्ञ शुशिल अधिकारीका अनुसार चारवटा खुट्टा भएको कुखुरा जन्मिनुका विभिन्न कारणमध्ये रेडियोधर्मी किरणको प्रभाव मुख्य हो । यस्तो किरणले कुखुराको भ्रुणलाई असर गर्छ र कुखुराको शरीरमा असामान्य परिवर्तन देखापर्छ ।