सोमबार एकाएक भेडेटार तथा आसपासका डाँडाहरू सेताम्य देखिए । डाँडाहरू सेताम्मे देखिएसँगै भेडेटार पुग्नेहरूको भीड ह्वात्तै बढ्यो । भेडेटार बजार तथा आसपासका डाँडामा हिउँ खेल्दै भिडियो लिने तथा सेल्फी खिच्नेहरूको दृश्यसमेत आकर्षक देखिन्थ्यो । वर्षासँगै परेको असिनाले भेडेटार र आसपासका डाँडा ढाकिएपछि ‘हिउँ परेको’ भन्दै फेसबुकमा पोस्ट गरिएका तस्बिर तथा भिडियोहरू भाइरल नै भए । भेडेटारको मौसम अनि सौन्दर्यले त्यसै पनि जो–कसैलाई लोभ्याउँछ । बादलसँग लुकामारी खेलिरहने भेडेटारलाई सोमबार भने असिनाले हिउँझैं ढाकेको थियो ।

लामो समयपछि भेडेटार सेताम्मे भएको हेर्न पूर्वीे नेपालका बासिन्दाहरूका साथै भारतीयहरू समेत पुगेका थिए । असिना पानी परेपछि भेडेटारको मौसम पनि खुलेको थियो भने भेडेटारबाट देखिने कुम्भकर्ण, मकालु हिमालसँगै सप्तकोसी ब्यारेज तथा तराईका फाँट पनि स्पष्ट देखिए । भेडेटारमा २२ वर्षपछि असिना परेका कारण बढेको भीडसँगै भेडेटार जाने आन्तरिक तथा बाह्य पर्यटकका मोटरसाइकल तथा साना सवारीका कारण तीन घन्टाभन्दा लामो समय सडक जाम भयो । त्यहाँ उक्त दिन २ फिटसम्म असिना जमेको बताइन्छ ।

भेडेटारमा हिउँ पर्‍यो भन्ने हल्ला सुन्नासाथ भेडेटार पुगेर असिना खेलिरहेका धरान–८ स्थित गजुरमुखी ट्रेड एन्ड सर्भिस लिंकका प्रोप्राइटर गोपाल आचार्यले असिना परेको देखेको भए पनि यतिको मोटो असिना पहिलोपल्ट देखेको बताए । ‘हिउँ भनेर आएको तर असिना रहेछ,’ उनले भने–‘तैपनि सार्‍है रमाइलो भयो ।’ उनीसँगै भेटिएका भारतीय पर्यटक एसपी सिंहले सोमबार धरानबाट भेडेटारका डाँडा सेताम्मे देखेपछि त्यहाँ पुग्दा रमाइलो भएको अनुभव सुनाए । उनले भने–‘मैले पहिलो पटक यति बाक्लो असिना परेको देखेको हुँ, यहाँ आएर खेल्न पाउँदा अझ रमाइलो भयो ।’ लामो समयपछि भेडेटारमा परेको यो असिनालाई स्थानीय बासिन्दाहरू भने मोटो हिउँ भएको दाबी गर्छन् । उच्च हिमाली भेगमा पातलो हिउँ पर्ने भन्दै भेडेटारमै जन्मिएका ६१ वर्षीय हरिबहादुर लिम्बूले जलवायु परिवर्तनका कारण भेडेटारमा मोटो हिउँ परेको दाबी गरे ।

भेडेटारका बूढापाकाहरू यहाँ २२ वर्षपछि मोटो हिउँ परेको बताउँछन् । भेडेटार खानेपानी तथा सरसफाइ समितिका ६१ वर्षीय अध्यक्ष हरिबहादुर लिम्बूका अनुसार यसअघि २०५१ सालमा भेडेटारमा यस्तै मोटो हिउँ परेको थियो । ‘यो मोटो हिउँ नै हो । भेडेटारमा दिउँसो १२ बजेदेखि नै वर्षातसँगै असिना झर्न थालेसँगै असिना खेल्नेहरूको भीड लागेको होटल एसोसिएसन भेडेटारका अध्यक्ष लीलाराज लावतीले बताए । लावतीका अनुसार असिना परेको दिन सोमबार मात्र आन्तरिक तथा भारतीय गरी ३० हजारभन्दा बढी पर्यटक भेडेटार पुगेका थिए ।