यतिबेला सारा विश्व नै फुटबलमय भएको छ । यसबाट नेपाल पनि अछुतो रहन सक्दैन । नेपालमा जर्मनी, ब्राजिल, पोर्चुगल, अर्जेन्टिना, स्पेन आदि देशका प्रशंसक अधिक छन् भने बेल्जियम, फ्रान्स, इंग्ल्यान्डका पनि फ्यान उत्तिकै छन् । विश्वकप फुटबलको सरगर्मी चिया पसलदेखि टोलटोलसम्म पुगिसकेको छ । यतिबेला युवायुवतीहरू सडकमा आफूलाई मन पर्ने देशको जर्सी लगाएर हिँड्न थालिसकेका छन् । ती देशका झन्डा मोटरसाइकल तथा कारमा फर्याइएको छ । विश्वकपलाई लक्षित गरी जर्सी, झन्डा, किरिङ आदि सामग्री बिक्री भैरहेको छ । मोरङको उर्लाबारी–७ स्थित न्यू पाथीभरा स्पोर्ट्स सेन्टरका सञ्चालक महानन्द कोइरालालाई यतिबेला विश्वकपका जर्सी, झन्डा, किरिङ आदि सामग्री बिक्री गर्न भ्याइनभ्याइ छ । जर्मनी, ब्राजिल, पोर्चुगल, अर्जेन्टिना, स्पेन आदि देशका जर्सीको माग अधिक रहेको उनको भनाइ छ ।
आफ्नो पसलबाट दैनिक ५० पिसजति जर्सी बिक्री भैरहेको जानकारी दिँदै कोइरालाले भने– ‘विश्वकप नजिकिएसँगै यसको व्यापार बढ्दो छ ।’ बालबालिकादेखि युवा पुस्तामा विश्व कपको रौनक निकै देखिन्छ । ठूलाले लगाउने, सानाले लगाउने, हाफ, फुल सबैखाले जर्सीको बिक्री भैरहेको छ— झापाको दमकका व्यवसायी सुरज अधिकारीले भने । ७ सय रुपैयाँदेखि ३ हजारसम्मका जर्सी बिक्री हुँदै आएको अधिकारीको भनाइ छ ।
आ–आफ्नै दाबी
मोरङ क्षेत्र नम्बर १ का सांसद कुशल लिम्बू पोर्चुगलका फ्यान हुन् । उनी यसपटक विश्वकपको उपाधि पोर्चुगलले जित्ने दाबी गर्छन् । क्रिस्टियानो रोनाल्डोलगायतका खेलाडी पोर्चुगलमा रहेका कारण पनि पोर्चुगलले उपाधि जित्ने उनको विश्वास छ । सांसद लिम्बूमात्र होइन उर्लाबारीका युवा ब्यवसायी दिनेश श्रेष्ठ पनि पोर्चुगलले उपाधि जित्नेमा आशावादी छन् । उर्लाबारी फुटबल क्लबका पूर्वअध्यक्ष घनश्याम भण्डारी भने यस पटकको विश्वकप अर्जेन्टिनाले जित्ने बताउँछन् । मेसीलगायतका खेलाडी उच्च फर्ममा रहेकाले पनि अर्जेन्टिनाले उपाधि चुम्ने उनको विश्वास छ । फुटबल खेलाडी निरोज बस्नेत स्पेनका फ्यान हुन् । उनी स्पेनले यस पटकको विश्वकपको उपाधि उचाल्ने दाबी गर्छन् ।
पूर्व राष्ट्रिय खेलाडी सञ्जिब बुढाथोकी ब्राजिलका फ्यान हुन् । ब्राजिल अहिले फर्ममा छ । उसको टिम पनि बलियो छ । त्यसैकारण पनि उपाधि ब्राजिलले जित्ने बुढाथोकीको दाबी छ । नेपाल कम्यूनिष्ट पार्टी मोरङका नेता रुपेश खतिवडा ब्राजिलले उपाधि जित्ने बताउँछन् । त्यस्तै, लेटाङकी भूमिका पाख्रिन पनि ब्राजिलकी फ्यान हुन् । उर्लाबारीका अनुप कठायत भने विश्वकप जर्मनीले जित्नेमा विश्वस्त छन् । जर्मनी उत्कृष्ट टिम भएकाले यस पटकको उपाधि जित्दै ब्राजिलसँगै पाँच पटक उपाधि उचाल्ने टिमका रूपमा बराबरीमा आउने उनी बताउँछन् । यी त केही उदाहरण मात्र हुन् । सबैका आ–आफ्नै दाबी छन् । अहिले चिया पसलमा विश्वकप फुटबलको उपाधि कसले जित्नेछ भन्ने यस्तै चर्चा–परिचर्चा नै बढी हुन्छ ।
ठूलो पर्दामा विश्वकप
मोरङको उर्लाबारीमा प्रदेश नम्बर १ कै ठूलो पर्दामा प्रोजेक्टरमार्फत विश्वकप फुटबल देखाइने भएको छ । ग्लोबल क्लब उर्लाबारीले खेलप्रेमीहरूलाई मध्यनजर गरेर ठूलो पर्दामार्फत विश्वकप फुटबल हेर्ने व्यवस्था मिलाएको हो । क्लबका प्रमुख सल्लाहकार सर्वजित भण्डारीका अनुसार विश्व फुटबलको महाकुम्भमा सबै खेलप्रेमीलाई एकै स्थानमा भेला पारेर प्रोजेक्टरमार्फत सहज रूपमा खेल हेर्ने व्यवस्था मिलाइएको छ । उर्लाबारी–७ स्थित चेरी टमोटो होटलले पनि बिश्वकप फुटबल प्रतियोगिता ठूलो पर्दामा देखाउने भएको छ । खेलप्रेमी तथा ग्राहकहरूका लागि सहज रुपमा होटलमै विश्वकप फुटबल देखाउन लागिएको सञ्चालक दिनेश श्रेष्ठले जानकारी दिए । मोरङको उर्लाबारीसहित पथरी, बेलबारी, झापाको दमक, विर्तामोड, इलाम, ताप्लेजुङ आदि स्थानहरूमा पनि प्रोजेक्टरमार्फत ठूलो पर्दामा विश्वकप फुटबलका खेलहरू देखाउने तयारी भैरहेको छ ।
सट्टाबाजी
विश्वकप फुटबल रसियामा चल्दा नेपालमा भने सट्टाबाजी मौलाउने निश्चित छ । मनोरञ्जनका नाममा सट्टाबाजीले विकृतिसमेत सिर्जना गरिरहेको छ । विभिन्न खेलका अन्तर्राष्ट्रिय प्रतियोगिताहरूमा सट्टाबाजी गर्ने नेपालीहरू घरबारविहीनसमेत भएका छन् । सट्टाबाजी गराउने कम्पनीका वेबसाइटमा आफ्नो अकाउन्ट खोलेर नेपालमा स्थानीय एजेन्ट खोज्ने र उनीहरूमार्फत ग्राहक खोजेर सट्टाबाजी गराइएको पाइन्छ । गिरोहले गराउने बेटिङमा २५ हजारदेखि १५ लाखसम्मको बेटिङ भएको पाइन्छ । बढी रकमको बेटिङ भएको अवस्थामा उक्त गिरोहले बाहिरका सट्टाबाजलाई ‘फरवार्ड’ गर्ने गरेका छन् ।