नेपालको सबैभन्दा चिसो जिल्ला मुस्ताङ हो । यहाँ माइनस २७ डिग्रीसम्म चिसो हुने तथ्यांक छ । दोलखाको जिरी, तेह्रथुमको वसन्तपुर, धनकुटाको हिले र भेडेटार, इलामको कन्याम, मकवानपुरको दामन, नुवाकोटको ककनी, भक्तपुरको नगरकोट, जुम्लाको खलंगा र हुम्लाको सिमिकोट तथा जोमसोम सदावहार जाडो हुने स्थान हुन् । 

तराईको शीतलहर

चिसो बढेसँगै तराईमा शीतलहर चल्छ । प्रत्येक वर्ष शीतलहरका कारण यस क्षेत्रमा कैयौं मानिसको ज्यान गएको पाइन्छ । यो वर्ष पनि मध्य तथा पश्चिम तराईमा शीतलहर सुरु भैसकेको छ । शीतलहरका कारण प्रत्येक वर्ष १५ देखि २० जनाको ज्यान जाने गरेको थियो ।

शीतलहर चल्दा न्याना कपडाको अभाव र दह्रो बासस्थान नभएका कारण कठ्याङ्ग्रिएर मृत्यु हुने गरेको हो । शीतलहरले तराईका २२ वटै जिल्लालाई प्रभावित तुल्याउँदै आएको छ । शीतलहरले पार्ने प्रभावका बारेमा प्रयाप्त जानकारी नहुँदा बर्सेनि मानिसको ज्यान जाने इपिडिमियोलोजी तथा रोग नियन्त्रण महाशाखाका पूर्वप्रमुख डा. बाबुराम मरासिनी बताउँछन् । शीतलहरले बालबालिका तथा वृद्धवृद्धा बढी प्रभावित हुने डा. मरासिनीको अनुभव छ ।