‘धनमात्र भएर हुदैन सहयोग गर्ने मन पनि चाहिन्छ’ यहि भनाइलाई चरितार्थ गरिदिए हङकङमा बसोबास गर्दै आएका तेक्वान्दोका ग्राण्ड मास्टर तुलसीकुमार गुरुङले । 

कोभिड १९ ले नेपाल लकडाउनमा छ, गरेर खानेहरु बाहिर निस्कन पाएका छैनन् । दैनिक रुपमा कमाई गरेर खानु पर्नेहरुको जीवन कष्टकर बन्दै गएको छ । कोभिड–१९ को संक्रमणको भयसंगै बाँच्नकालागि कष्टकर जीवन विताइरहेका गण्डकी प्रदेशको मादी गाउँपालिका अन्र्तगतका गाउँलेहरुलाई गुरुङले १० लाख रुपैयाको आर्थिक सहयोग गरेका हुन् । 

एक कार्यक्रमका बीच मास्टर गुरुङकी आमा काली गुरुङले वारचौक गाउँका पुर्व प्रधानाध्यापक कृष्णबहादुर गुरुङलाई सहयोग रकमको चेक हस्तान्तरण गरेकी थिइन् ।  

ग्राण्ड मास्टर तुलसी भन्छन्– यो सहयोग मादी गाउँपालिका अन्र्तगतका गाउँहरु वारचौक, तोगीगाउँ, पुरानो भाचौक, मेन भाचौक मेरो आमा र मेरो जन्मगाउँहरुलाई हो । लगभग १ सय ९६ घरधुरी रहेको उक्त गाउँमा ५ हजार रुपैयाका दरले सहयोग रकम हस्तान्तरण हुनेछ । नेपालमा लकडाउनको समयसिमा समाप्त हुने वित्तिकै प्रत्येक घरधुरीलाई रकम वितरण गरिनेछ ।  

राहत रकम वितरणलाई सहज बनाउनकालागि ईश्वरबहादुर गुरुङको नेतृत्वमा समिती बनिसकेको छ, उहाँहरुको टिमले राहत रकम वितरण गर्नेछन् । कोभिड–१९ भाइरसले संसार आतंकित बनिरहेको छ, आफ्नो जन्म गाउँमा मैले सकेको सानो सहयोग गरेको हुँ । आत्मसन्तुष्टि भन्दा ठुलो केही नहुने रहेछ, जीवनका अधिकांश समय विदेशमा ब्यथित गरेपनि मेरो मन र समर्पण जहिल्यै आफ्नै देश र गाउँमा छ । 

२० बर्ष ब्रिटिस आर्मीबाट निवृत भईसकेपछी निरन्तर २३ बर्षदेखी हङकङलाई कर्मथलो बनाईरहेका छन् ग्राण्ड मास्टर गुरुङले । हङकङको नेपाली समाजमा स्वच्छ, ईमान्दार र कर्मनिष्ठ छवी बनाएका उनी नेप्लिज तेक्वान्दो एसोसियसन हङकङ प्रेसिडेन्ट, मितेरी सेवा समिती पोखरा अध्यक्ष, वीवील राईज फाउन्डेशन संस्थापक लगायतका सामाजिक संघसस्थाहरुमा आवद्ध रहेका छन् । 

खेलकुद र शिक्षाको क्षेत्रको विकासमा निरन्तर सहयोगकालागि तयार हुने तुलसीले विभिन्न समयमा खेलाडी र विद्यार्थीहरुलाई ब्यक्तिगत र आफु आबद्ध रहेको संस्था मार्फत सहयोग गरिरहेका छन् । 

गुरुङ भन्छन्– भुकम्पपछी सहयोग हेतु स्थापना गरिएको वीवील राईज फाउण्डेशनले अहिले शिक्षा, खेलकुदको क्षेत्रमा निरन्तर सहयोगका कार्यक्रमहरु गरिरहेको छ । पर्यटन प्रर्वद्धनका लागि हामीले हाम्रो क्षेत्रबाट प्रयास गरिरहेका छौ । मानविय सहयोग र आफ्नो देशप्रतिको जिम्मेवारीबाट किमान्त म पछि हट्दिन । संसारको जुनसुकै कुनामा बसेपनि नेपाली मन र नेपाली सानको लागि काम गरिरहेको हुन्छु उनी थप्छन् । 

वर्तमान विषम परिस्थितीलाई मध्यनजर गर्दै तुलसीले आफ्नो पोखरा र काठमाडौमा रहेको घरमा १ महिनाको भाडादर निशुल्क गरिदिएका थिए । गुरुङ भन्छन् सहयोग सानो नै किन नहोस्, कसैको लागि ठुलो हुन सक्छ । सवैले मानवियता देखाउने हो, भने अवश्य केहि परिवर्तन सम्भव छ ।