ओहो, कुस्त धन कमाउन धेरै गाह्रो छ । कसैले भ्रष्टाचार गरेर कमाउँछन् भने कसैले परिश्रम गरेर धन कमाउँछन् ।
- चन्दा देवान, गायिका
मेहनत र सही क्षेत्रमा लगानी गर्न सकियो भने कुस्त धन कमाइन्छ कि ?
- हेमन्त शर्मा, गायक
आफूलाई सन्तुष्टि दिने धन नै कुस्त धन हो । यो इमान्दार र सिर्जनशील भएर पनि कमाउन सकिन्छ ।
- सरोज प्याकुरेल, संगीतकार
राम्रो काम गरे ठिक्क धन कमाइन्छ, तर कुस्त धन कमाउन चाहिँ कि अरूलाई ठग्नु पर्छ अर्थात् अरूलाई मुर्गा बनाउनुपर्छ ।
- घनश्याम गौतम, अभिनेता
काममा जति धेरै मेहनत गर्यो त्यति नै सफलता पाइन्छ । सफल भएपछि धन त आफैं आउने कुरा हो नि ।
- राधिका कँडेल, आरजे/भिजे
सुपरहिट गायक हुन सकियो भने नाम त स्वत: कमाइन्छ, धन पनि कुस्त नै कमाइन्छ ।
- योगेशकाजी, गायक
मेहनत गरेर मात्र कुस्त धन कमाउन सकिन्छ ।
- राम ठाकुर, हेयर स्टाइलिस्ट
उत्तर साधारण छ नि...जस्तो काम गर्यो, त्यस्तै धन कमाइन्छ ।
- सुरेन श्रेष्ठ, कलाकार
भ्रष्टाचार र घूस खाए कुस्त होइन पुस्त धन कमाइन्छ नि ।
- दमन रूपाखेती, हास्य अभिनेता
धन कसरी कमाइन्छ भन्दा पनि आफूसँग जे छ, त्यसमै सन्तुष्ट हुनु राम्रो ।
- शंकर अधिकारी घायल, निर्देशक
मनुष्य असन्तुष्ट प्राणी...कतिलाई धेरै भन्ने हो नै थाहा हुँदैन । सानो–सानो चिजमा खुसी हुन सक्नेले त्यसै सन्तुष्टि कमाइ हाल्छ ।
- एसराज गराच, अभिनेता
सादा विचार तथा कर्म व्यापक गर्नुपर्छ । त्यसका साथै नि:स्वार्थ भावनाले लक्ष्मीमाताको पूजा–आराधना गर्नुपर्छ ।
- चिरञ्जीवी भण्डारी, संगीतकर्मी
आफ्नो काममा ध्यान दिन सकियो भने कुस्त धन कमाउन गाह्रो छैन ।
- अनुष्का पाठक, गायिका
कर्मले नै मानिसलाई सफल बनाउँछ । आफ्नो कर्ममा ध्यान दिन सकियो भने धन कमाउन कसैले छेक्दैन ।
- कला सुब्बा, कोरियोग्राफर
सानो लगानीबाट सफलता हासिल गर्दै उक्त व्यवसायलाई ठूलो बनाउन सके कुस्त धन कमाइन्छ ।
- सुरज प्रजापति, कलाकार
इमान्दारिताका साथ काम गर्नुपर्छ, ढिलै भए पनि प्रगति हुन्छ ।
- रेनुका थापा, गायिका
राम्रो व्यवसाय गरे कुस्त धन कमाइन्छ ।
- बीपी वाग्ले, गायक
हिम्मत नहारी मेहनत गर्ने हो भने कुस्त धन कमाउन सकिन्छ ।
- नवीन खतिवडा, गायक
राजनीतिमा लागियो र नेता भइयो भने ।
- भरत रेग्मी, भिजुअल सम्पादक
के गरी कमाइन्छ ? म त्यसकै खोजीमा छु । अहिलेसम्म पत्ता लगाउन सकेको छैन ।
- राजन घिमिरे, पत्रकार
आफूलाई सबैभन्दा धनी सम्झेर काम गर्ने ।
- कृषा चौंलागाईं, निर्मात्री
कि मेहनत गरे कुस्त कमाइन्छ, कि भष्ट्राचार गरे कुस्त कमाइन्छ हाम्रो नेपालमा ।
- शारदा थापा, समाचारवाचिका
म पनि त्यही सोचिरहेको छु, कसले बताउला तरिका ?
- सञ्जय बराल, रेडियोकर्मी
कालोबजारी गर्नुहोस्, व्यापार गरे पनि कर छल्नुहोस्, नेता भएर जनता ठग्नुहोस् ।
- शान्तिम कोइराला, गायक
सही पेसा अनि सही लगानीमा भाग्यले साथ दियो भने कुस्त धन कमाउन सकिन्छ ।
- निकेश खड्का, निर्देशक
भाग्यमा लिएर आएको हुनुपर्छ ।
- बबिता मानन्धर, गायिका
दुईनम्बरी धन्दा र भ्रष्टाचार गरे ।
- विकास सुवेदी, भिडियो निर्देशक
हात पाखुराले मेहनत, मनबाट संघर्ष अनि दिमागबाट सही व्यवस्थापन गर्न सके ।
- सन्तोष सेन, निर्माता
समयको मागअनुसार सही तरिकाबाट दिमाग लगाएर, आँट गरेर, कडा मेहनत गरेपछि भाग्यले साथ दिए ।
- अलाइभ ग्लाइडर, व्यवसायी
यो प्रश्न त बिल गेट्स, विनोद चौधरी, अम्बानी ब्रदर्स, जुकरबर्ग, अलिबाबा डटकमका ज्याकहरूसँग पो सोध्नुपर्ने ।
- डिजे शिशिर
इमान्दार भएर आफ्नो करियरप्रति ध्यान दिइयो भने ।
- सुवास प्रधान, संगीतकर्मी
कुस्त धन कमाउन त कि चिठ्ठा पर्नुपर्छ कि गलत बाटो समात्नुपर्छ ।
- जीवन पराजुली, सञ्चारकर्मी
इमान्दार एवं लगनशील भै धैर्यताका साथ मेहनत गरियो भने कुस्त धन कमाइन्छ ।
- मिलन शंकर, अभिनेता
अरू काम गरे सुस्त धन कमाइन्छ । बजारको ट्रेन्ड हेर्दा हिट लोकगीत राखेर झुर कमेडी चलचित्र बनाउँदा कुस्त धन कमाइने देखियो । इज्जतलाई बाल मतलब गरेर राजनीति गर्दा पनि कुस्त धन कमाएर चुस्त हुने रैछ ।
कुमार भट्टराई, निर्देशक/लेखक
धर्म र पाप भन्ने कुरा नि कहीं हुन्छ र ? भन्ने सोचियो भने ।
- अजय अधिकारी सुशिल, गायक
अहिलेको जमाना लगानीको छ । उचित रूपले लगानी गर्न सके, विचार पुर्याएर आफ्नो धन सुरक्षित गर्न सके । घर बसीबसी कुस्त कमाउन अहिले चलेको फेसन सेयरमा लगानी
गर्नु नै हो ।
- विजय अधिकारी, लेखक