चलचित्रको बारेमा सोचेकी छैन

-  प्रकाश रानाभाट

आश्विन ६, २०७६

समाचारवाचिका शैल सुमन सिलवाल केही दिनयता सामाजिक सञ्जालमा छाइरहेकी छिन् । नेपाल टेलिभिजनमा अंग्रेजी समाचार वाचन, समाचार लेखन तथा सम्पादनमा कार्यरत सिलवाल अहिले युवापुस्तामाझ चासो र चर्चाको विषय भएकी छिन् । सुन्दरता र प्रस्तुतिका कारण सामाजिक सञ्जालमा चर्चा कमाएकी शैलसँग साप्ताहिककर्मी प्रकाश रानाभाटको जम्काभेट :

समाचारले भाइरल नै बनायो होइन ?

भाइरल नै बनायो भन्नुपर्‍यो । धेरै जनाले नोटिस गर्नुभएको छ, पछ्याइरहनुभएको छ । सामाजिक सञ्जालहरूमा विभिन्न ट्रोल पनि देखिरहेकी छु । 

भाइरल हुँदा कस्तो अनुभव हुँदो रहेछ ?

रमाइलो लागेको छ । आफूले गरेको कामको मूल्याङ्कन भैरहेको छ भन्ने भएको छ । पहिलेको तुलनामा जिम्मेवारी थपिएको महसुस गरेकी छु । 

भाइरल हुनुमा तपाईंको सुन्दरताले भूमिका खेल्यो कि प्रस्तुतिले ? 

दुवैले उत्तिकै भूमिका खेलेजस्तो लाग्छ । सुन्दरताले मात्र भूमिका खेलेको भए जसरी सजिलै दर्शकले मन पराउनुभयो त्यसरी नै तल झारिदिनुहुन्थ्यो । मेरो प्रस्तुतिले पनि दर्शकहरूलाई छोएको हुनुपर्छ ।

मिडियामा किन आउनुभयो ?

म सानैदेखि बोल्न रुचाउने स्वभावकी थिएँ । अरूले मैले बोलेको, काम गरेको सुनून्–देखून् भन्ने लाग्थ्यो । मिडियामार्फत समाजमा केही गर्न सकियोस्, केही योगदान पुर्‍याउन सकियोस् भन्ने हिसाबले यो क्षेत्र रोजेकी हुँ । 

अध्ययन कहाँ गर्नुभयो ?

मैले एसएलसी जेम्सबाट, प्लस टु र ब्याचर गोल्डेन गेटबाट अनि मास्टर्स त्रिभुवन विश्वविद्यालयबाट गरेकी हुँ । पत्रकारिताको अध्ययनका लागि चाहिँ अमेरिकी दूतावासबाट सुसी नामक कार्यक्रमअन्तर्गत वासिङ्टन युनिभर्सिटीमा जाने अवसर मिल्यो । त्यहाँ रहँदा मैले टेलिभिजन, रेडियो तथा पत्रपत्रिकाका बारेमा बुझ्ने अवसर पाएँ ।

तपाईंको नेपाली राम्रो कि अंग्रेजी ?

चिने–जानेजति सबैले मेरो अंग्रेजीको प्रशंसा गर्नुहुन्छ । तिम्रो कस्तो राम्रो अंग्रेजी भन्नुहुन्छ । म आफैंलाई पनि अंग्रेजी नै राम्रो लाग्छ ।

समाचार वाचनका लागि अङ्ग्रेजी नै किन रोज्नुभयो ?

मेरो अंग्रेजी भाषा राम्रो भएका कारण नेपालीमा भन्दा अंग्रेजीमै कन्फिडेन्स आयो । 

पहिलो पटक समाचार पढ्दाको अनुभव सुनाइदिनुहोस् न ? 

वर्षौंदेखिको सपना साकार हुँदै थियो, त्यसैले केही नर्भस अनि धेरै उत्साहित महसुस गरेकी थिएँ । 

आफूले पढेको समाचारको रेकर्ड हेर्नुहुन्छ ?

बेला–बेलामा हेर्छु । सुरु–सुरुमा पढेको समाचारको रेकर्ड हेर्दा खुसी लाग्थ्यो । आफूलाई सुधार्न पनि समय–समयमा त्यस्तो रेकर्ड हेर्नुपर्छ ।

भविष्यको लक्ष्य ?

मानिसको एउटा लक्ष्य भए पनि समयले कहिले कता त कहिले कता पुर्‍याउँछ । मेरो चाहिँ जुन क्षेत्रमा भए पनि त्यो क्षेत्रलाई न्याय दिने र सफलता हासिल गर्ने लक्ष्य छ । अध्ययनमा पीचडीसम्म गर्ने सोच छ ।

धेरैले तपाईंको सुन्दरताको प्रशंसा गर्छन् ? तपाई आफैलाई कति राम्री छु जस्तो लाग्छ ?

मलाई सुन्दरता हेर्ने आँखामा भर पर्छ जस्तो लाग्छ । म आफ्नो रूपरंगप्रति सन्तुष्ट छु ।

राम्री बन्नचाहिँ के–के गर्नुहुन्छ ?

नकारात्मक सोच हाबी हुन दिन्नँ । खानपानमा ध्यान दिनुका साथै शारीरिक व्यायाम पनि गर्छु ।

आफैंलाई मन पर्ने आफ्नो अंग ?

आँखा ।

चलचित्रबाट अफर आयो भने ?

तत्काललाई सोचेको छैन । केही समयपछि मेरो क्षमताले गर्न सक्ने र राम्रो कथा प्राप्त भयो भने सोच्नैपर्छ ।

फुर्सदमा के गर्नुहुन्छ ?

पुस्तक पढ्छु । विभिन्न ठाउँ घुम्न जान्छु, युट्युबमा भएका जीवनसँग सम्बधित प्रभावकारी भिडियोहरू हेर्छु । 

तपाईंलाई मन पर्ने समाचार वाचक/वाचिका ?

बन्दना राणा ।

सामाजिक सञ्जाल कत्तिको चलाउनुहुन्छ ?

त्यस्तो धेरै चलाउँदिनँ । तर सामाजिक सञ्जालमा मेरो कामलाई लिएर ट्रोल बन्न थालेपछि अलि बढी चलाउन थालेकी छु । 

प्रतिक्रिया चाहिँ कस्ता आउँछन् ?

धेरैले मेरो वाचनशैली अनि सुन्दरताकै बयान गर्नुहुन्छ । केहीले चाहिँ तपाईंलाई देखेपछि हामीलाई पनि सरकारी जागिरमा प्रवेश गर्न हौसला मिलेको छ भन्नुभएको छ ।

प्रकाशित :आश्विन ६, २०७६

तपाईको प्रतिक्रिया

कमेन्टको लागि यहाँ click गर्नुहोस्

फेसबूक कमेन्ट गर्नुहोस्

फेसबूक छैन? यो फारम प्रयोग गर्नुहोस्

×