राजेश हमालको ‘लक डाउन’ योजना (भिडियो सहित)

  • सेल्फ क्वारेन्टाइनबाटै भन्छन्, ‘गर्न नपाएको काम गर्नुस् तर बोर नहुनुस्’

- अनिल यादव

चैत्र ११, २०७६

सरकारले कोरोना भाइरस (कोभिड १९) संक्रमणको जोखिम बढेपछि गरेको ‘लक डाउन’को पहिलो दिन बिहानै अभिनेता राजेश हमालले आफ्नो फेसबुक पेजमा ‘डे वान’ लेख्दै एउटा भिडियो सेयर गरे । भिडियोमा उनी अमेरिकन गायक जस्टिन टिम्बरलेकको चर्चित गीत ‘अ हन्ड्रेड माइल्स’ गुन्गुनाइरहेका छन् । 

भिडियो सन्देशमार्फत आफ्ना दर्शकलाई सचेत र सर्तक रहन आग्रह गरिरहेका हमाललाई भिडियोमा हेर्दा लाग्छ– उनी यसमा गीतमात्रै गुन्गुनाइरहेका छैनन्, अरूलाई कति पनि बोर नभइकन ‘लक डाउन’को सदुपयोग गर्न संकेत गरिरहेका छन् । 

विन्दास पारामा गीत गाइरहेको भिडियो सार्वजनिक गरेपछि हमालसँग सम्पर्क गर्दा उनी जोडले हाँसे । ‘म त हत्तपत्त बोर नहुने मान्छे, अरू पनि बोर नहोउन् भनेर यसो रमाइलो गरेको नि,’ लाजिम्पाटस्थित सेल्फ क्वारेन्टाइनबाट उनले सुनाए । 

पहिले दिनको पहिलो काम अर्थात् ‘म्युजिक थेरापी’ त उनले फेसबुकमा सेयर गरिहाले । तर, सातै दिनको योजनाबारे जिज्ञासा राख्दा सुरुमा उनी ठट्यौली पारामै प्रस्तुत भए, ‘घरबाट बाहिर हेर्दा गार्डेन देखिन्छ, भित्र मधुुको अनुहार ।’ 

गज्जबले हाँसेपछि उनले फेरि भने, ‘जे होस् मधु (श्रीमती)लाई समय दिन पाइएको छ, म पनि खुुशी छु, उनी पनि खुुशी ।’

राजेश यो सात दिन अरू बेलाभन्दा फरक केही गरिरहेका छैनन् । फुर्सदका बेला जसरी उनी आफूलाई ‘अकुपाइड’राख्थे, यी दिन पनि त्यसरी नै  बिताउने उनको योजना छ ।  कहिले म्युजिक सुनेर, कहिले व्यायाम गरेर, कहिले पुस्तक पढेर त कहिले युट्युुबमा डकुुमेन्ट्री र सूचनामुुलक सामग्री हेरेर । ‘म अरुबेला फुर्सदमा यिनै कामहरु गर्थें, यो सात दिनमा पनि यसरी नै बित्नेछ,’ उनले भने । 

एउटा किताब उनले पढ्न भनेर साँचिराखेका छन्, त्योचाहिँ यही सात दिनमा पूरा गर्न चाहन्छन्–‘अ कम्प्लिट ह्यान्ड बुक अफ नोभेल राइटिङ’ । 

‘यसको अर्थ निकट भविष्यमा राजेश हमालको उपन्यास आउँदैछ ?’

‘केही न केही त आउला, तर जे आउँछ त्यो अरूको फर्मुला पढेर भन्दा पनि मनबाटै आउँछ । सिर्जनामा फर्मुला काम लाग्दैन । सिर्जनामा सधैँ आफ्नै हृदयलाई सुन्नुुपर्छ । अनिमात्रै मौलिकता देखिन्छ ।’

मंगलबारबाट लक डाउन हुने निर्णय राजेशले सोमबार राति अबेरमात्रै थाहा पाएछन् । त्यसैले खानपिनको जोहो गर्न पाएनन् । ‘यो सात दिनमा खानपिन, पानी आदिचाहिँ के हुुन्छ, सोच्नुपर्ने अवस्था छ,’ उनले भने, ‘बिहान खाद्यस्टोरहरू खुल्ला हुन्छ होला भन्ठानेको थिएँ, बिहान हेर्दा भेटिनँ । यद्यपि दुुई–चार दिन चल्छ होला, त्यसपछि पुुगेन भने ४८ घन्टे फास्टिङ बस्नुपर्ला ।’

राजेशलाई लाग्छ, सबैले यो फुसर्दको समय बोर नमानिकन सदुुपयोग गर्नुपर्छ । ‘आफू व्यस्त हुँदा घरमा बसेर गर्न नपाएको कामहरू के के थियो, सबैभन्दा  सुरुमा त्यो सोच्नुपर्यो,’ उनको टिप्स छ, ‘कति मान्छेहरू भन्थे, व्यस्त भएर यो गर्न पाइएन, त्यो गर्न पाइएन । अब उनीहरूका लागि यो मौका हो, सदुुपयोग गर्नुपर्यो ।  पढ्न रुची भएको मान्छेले पढ्नुपर्यो । व्यायाम, योगा, ध्यानतिर रूची हुनेले त्यही गर्नुपर्यो । फिल्म हेर्न रुचाउनेले फिल्म हेर्नुपर्यो तर, बोर मान्दै अब के गर्ने भनेरचाहिँ बस्नुुभएन ।’

 

प्रकाशित :चैत्र ११, २०७६

तपाईको प्रतिक्रिया

कमेन्टको लागि यहाँ click गर्नुहोस्

फेसबूक कमेन्ट गर्नुहोस्

फेसबूक छैन? यो फारम प्रयोग गर्नुहोस्

×