राहत बाड्न निस्किएका कलाकार कामेश्वर चौरसियालाई प्रहरीले नियन्त्रणमा लिएको छ । हेटौंडाबाट पर्सास्थित सखुवा पर्सौनीमा रहेका लोपन्मुख उराव समुदायलाई राहत वितरण गर्न हिडेका उनीसहित थप चार जनालाई जिल्ला प्रहरी कार्यलय पर्साले राहत बाँड्न नदिई नियन्त्रणमा लिएको हो ।
‘अहिले हामीलाई थुनेर राखेको छैन तर नियन्त्रणमा भने छौं,’ कामेश्वरले फोन सम्पर्कमा भने, ‘हामी हाम्रो संस्था परोपकार युवा संजालमार्फत पर्साको दुर्गम स्थानमा रहेको सखुवा पर्सौनीमा त्यहाँ रहेका अति नै विपन्न उराव समुदायका १९ परिवारका लागि चामल, दाल, मास्क आदि सामग्रीसहित पुगेका थियौं । तर, त्यहाँका स्थानिय प्रहरीले ‘तपाईहरुले यसरी राहत वितरण गर्न मिल्दैन । यो राहत सामग्रीसहित तपाईहरुाई जिल्ला प्रहरी कार्यलयमा लाने आदेश छ’ भन्दै यहाँ लिएर आउनुभएको अवस्था छ ।’
कामेश्वरका अनुसार गाविस प्रमुख प्रदिप जैसवालको आग्रह र पत्रका आधारमा उनीहरु त्यहाँ राहत वितरण गर्न गइरहेका थिए । ‘दैनिक ज्यालादारीमा काम गर्ने त्यहाँका उराव समुदायका कतिपय घरमा अहिले चुल्हो बल्ने अवस्था छैन । निकै दयनिय अवस्था छ भन्ने जानकारी आएपछि स्थानिय सरकारको अनुरोधमा हामी त्यहाँ गइरहेका थियौं तर राहत बड्न नदिई प्रहरी कार्यलय ल्याइयो,’ उनले भने, ‘तीन घन्टा भयो नियन्त्रणमा छौं । एसपीसँग कुरा गर्न कुुरिरहेका छौं । उहाँ मिटिङ हुनुहुन्छ भनिएको अवस्था छ । अब हेरौं के हुन्छ ।’
यस विषयमा सखुवा पर्सौनीका गाउँपालिका प्रमुख प्रदिप जैसवालसँग सम्पर्क गर्दा आफूहरुसँगको समन्वय र अनुमतिपछि नै राहत वितरणका लागि कामेश्वरको टोली यहाँ आइपुगेको बताए । ‘सिडियो सा’बसँग सम्पर्क गर्दा गाविसको पत्र देखाएपछि त्यसरी प्रहरीले नसमात्नु पर्ने हो भन्नुहुन्छ । उता एसपी सा’बलाई ११ बजेदेखि फोन गरिरा’छु, उठिरहेको छैन । यसरी त यहाँका जनता कोरोनाले भन्दा भोकमरीले मर्ने भए ।’
साप्ताहिकले पनि पटक–पटक सम्पर्क गर्दा जिल्ला प्रहरी कार्यलय पर्साका एसपीको फोन उठेन । प्रहरी नियन्त्रणमा रहेको राहत वितरण टोलीमा कामेश्वरसँगै फिल्म निर्माता राजकुमार महतोसहित रमेश सापकोटा, जागृत चौरेल र प्रकाश पौडेल रहेका छन् ।