त्यो समयमा न उनी खान सक्थिन्, न उठेर हिँड्न नै । उनी भन्छिन्, ‘मैले त्यो बेला धेरै दु:खदायी जीवन बिताएँ, झन् अस्पतालको बसाइ कहालीलाग्दो नै थियो ।’

क्यान्सर लागेपछि सबैलाई लाग्ने गर्छ— अब जीवन सकियो । तर, आत्मविश्वासका साथ अघि बढ्न सके क्यान्सरलाई जित्न पनि सकिन्छ ।’ यो भनाइ हो— क्यान्सरपीडित चर्चित अभिनेत्री मनीषा कोइरालाको । मनीषा क्यान्सरलाई जितेर पछिल्लो समय समाजसेवामा लागेकी छन् ।

उनी मात्र होइन, क्यान्सरलाई जितेर समाजमा राम्रो काम गरिरहेका उदारहणहरू एकपछि अर्को थपिँदै गएका छन् । यसको राम्रो एक उदाहरण हुन्— बैंकर्स बसुधा नेपाल पोखरेल । उनी हाल एनसीसी बैंकमा असिस्टेन्ट म्यानेजरका रूपमा कार्यरत छन् । रौतहटको गौरमा जन्मेकी नेपालले बैंकमा काम गर्ने रहरका कारण विद्यालयस्तरदेखि नै एकाउन्ट पढिन् । विश्वविद्यालयमा पनि कमर्स पढिन् ।

स्नातक लेभलको अध्ययन सकेर बैंकमा जागिर खाने रहर बोकेकी उनी त्यति नै बेला वैवाहिक सम्बन्धमा जोडिन पुगिन् । विवाह भएपछि घरबारको अल्झनले अध्ययन र काममा बाधा पुगेको उनी बताउँछिन् । अझ बच्चा भएपछि कामको त कुरै भएन, तर पनि केही गर्न खोज्नेका लागि उपाय अनेक हुँदो रहेछ । समयको उचित सदुपयोगका लागि परोपकारी संस्था रेयुकाई नेपालमा स्वयम्सेवकका रूपमा काम गरिन् । त्यहीँबाट उद्घोषणलगायतको तालिम लिइन् ।

बच्चा ठूलो हुँदै गएपछि उनलाई काम गर्न सहज वातावरण बन्न थाल्यो । सानै उमेरदेखि बैंकमा काम गर्ने रहर फेरि ब्युँतियो । श्रीमान् पनि द वल्र्ड बैंकमा भएकाले उनलाई बैंकमा जोडिन र काम गर्न पनि सजिलो भयो । उनको बैंकिङ करिअर भने सन् २००३ मा श्रीलंका मर्चेन्ट बैंकमा असिस्टेन्ट पदबाट सुरु भएको हो । केही समय काम गरेर उनी श्रीमान्सँग अमेरिका गइन्, जहाँ पुगे पनि बैंकमा जागिर गर्ने रहरले भने उनलाई छोडेन । काम खोज्दै जाँदा उनले बैंक अफ अमेरिकामा काम पाइन् । त्यहाँ बैंकको काममा मेसिनको प्रयोग गर्न सिकिन् । कामलाई पूजा गर्ने प्रवृत्ति र ग्राहक भगवान् हुन् भन्ने पाठ अमेरिकामै सिक्ने मौका पाइन् । उनले सन् २००४ देखि २००६ सम्म अमेरिकी बैंकमै काम गरिन् ।

उनले अमेरिकी बैंकमा जागिर त पाइन्, तर बैंकमा कार्यरत श्रीमान्को अमेरिकाबाट नेपालमा सरुवा भएसँगै उनी सन् २००६ मा नेपाल फर्किइन् । नेपाल फर्किएपछि पनि वित्तीय क्षेत्रमा काम गर्ने रहर झन् बढ्यो । उनले लगत्तै पिपुल्स इन्भेस्टमेन्ट कम्पनीमा काम गरिन् । बसुदा एकपछि अर्को वित्तीय क्षेत्रमा फड्को मार्दै गइन् । इन्भेस्टमेन्ट कम्पनीपछि उनी कमर्सियल ट्रस्ट बैंकमा गइन् । ट्रस्ट बैंक ग्लोबल आईएमईमा मर्ज भयो । बसुदाले त्यही काममा निरन्तरता दिइरहिन् ।

क्यान्सर यात्रा

वित्तीय क्षेत्रमा हाँसीखुसी जीवन बिताइरहेकी बसुधालाई सन् २०१५ मा ठूलो बज्रपात आइलाग्यो । बिरामी भएजस्तो महसुस गरेर अस्पताल पुग्दा उनलाई चिकित्सकले ब्रेस्ट क्यान्सर भएको बताए । क्यान्सर रोगबाट कसरी सम्हालिनु ? उनले केही सोच्नै सकिनन् । उनी उपचारका लागि श्रीमान्सँग दिल्ली पुगिन् । एक वर्ष उनी पूरै उपचारमा रहिन् । अहिले क्यान्सरको पीडा भने उनी बताउन सक्दिनन् । त्यो समयमा न उनी खान सक्थिन्, न उठेर हिँड्न नै ।

उनी भन्छिन्, ‘मैले त्यो बेला धेरै दु:खदायी जीवन बिताएँ, झन् अस्पतालको बसाइ कहालीलाग्दो नै थियो ।’ उपचार खर्च त कति–कति ! उनलाई लाग्यो, कस्तो महँगो जिन्दगी पाएछु, तर पनि उनले हरेस भने खाइनन् । निरन्तर अगाडि बढ्ने साहस बटुलिरहिन् । परिवारको माया र साथले भने उनमा साहस बढ्दै गयो । उनलाई आफूमा आत्मविश्वास बढ्यो ।

वर्ष दिनको उपचारपछि काममा फर्किइन् । उनी विगत सुनाउँदै भन्छिन्, ‘क्यान्सर पहिलो चरणमै भएकाले पनि म बाँच्न सफल भएँ ।’ जिन्दगीमा केही गर्नुपर्छ भन्ने अठोटका साथ उनी वित्तीय क्षेत्रमा सक्रिय छन् । क्यान्सर जितेर बैंकिङमा रमाइरहेकी उनी भन्छिन्, ‘क्यान्सरलाई हराएँ, बैंकलाई पछ्याइरहेँ ।’